Húrra!!

Við erum heppin fjölskylda að vera öll við góða heilsu.  Af og til er maður minntur á að það er ekki sjálfgefið. Við erum þakklát fyrir það og njótum þess með því að taka þátt í því sem borgin hefur upp á að bjóða.  Um þessa helgi var fjölskyldudagur í nýlistasafninu, MCA, sem var stórkostlegt.  Við fórum í hermi-dans með dönsurum og Sólveig fékk að leiða hópinn.  Edda skrifaði gagnvirka sögu og þær bjuggu til litrík og formföst listaverk.  Síðan skoðuðum við allskonar framtíðarsýnir og nútíðarsýnir.  Æðislega skemmtilegt.



Í gær var frídagur í skólanum og Edda fór á fimleikanámskeið, Ásta í leikskólann en við Sólveig fórum niður í bæ í Art Institute.  Ég vildi endilega að við Sólveig gerðum þetta saman því við Edda fórum einmitt saman í svona ferð fyrir tvem árum. Meðan við biðum eftir því að safnið opnaði fórum við á kaffihús og spjölluðum við Spánverja sem komu hingað til að hlaupa í maraþoninu, löbbuðum í gegnum Millenium Park og spegluðum okkur í bauninni.  Á art institute sáum við vatnaliljurnar og heystakkana hans Monet, styttur af Búdda og vorum heillengi á fræðslusetrinu.  Eftir safnið hittum við pabba í hádegismat og fengum að kíkja á skrifstofuna til hans þar sem Óli galdraði fram tyggjó.  Það sló heldur betur í mark því þegar Edda spurði hana hvað hún hefði verið að gera allan daginn þá var svarið "við hittum pabba og ég fékk tyggjó!"