Húrra!!

Á ensku er til eitt orð yfir þetta hugtak, controversial.  Mér finnst eins og það hugtak feli í sér smá eldfimi, meðan íslenska hugtakið er hlutlausara.  Jæja.

Það er svo skemmtilegt hve íslensk smábörn eru öll svipuð.  Maður tekur best eftir því þegar maður sér svona mikið af útlenskum börnum eins og eru hérna í Ameríku og hittir síðan annað íslenskt barn. Þau íslensku eru öll svolítið stórgerð og hvít.  Annað sem einkennir íslensk börn er snuddan upp í þeim.

Hérna vestanhafs eru skiptar skoðanir á því hvort gott sé fyrir smábörn að hafa snuð.  Á Íslandi er mikið sagt að "þau hafa svo mikla sogþörf þessi grey" og þannig réttlætt að best sé fyrir börnin að sjúga lítið plast titti.  Náttúran kom þessari sogþörf þarna fyrir til að börnin myndu sjúga brjóstin á mömmu sinni og þannig kemur mjólk í brjóstin og síðan í mallann á börnunum.  Ljómandi vel úthugsað hjá henni.

Vinkona mín sem á þrjú börn, uppkomin og glæsileg, sagði mér að hún héldi að það hafi hjálpað sínum börnum þroskalega að vera ekki með snuddu.  Og núna loksins eru vísindamenn í Wisconsin búnir að spá í þessu og komust að þeirri niðurstöðu að með snuddu upp í sér geta smábörn ekki gert eins mikið af svipbrigðum og án snuddu.  Þau eru í meiri vandræðum með að herma eftir svipbrigðum fullorðinna og mögulega að læra inná tjáningu og tilfinningalíf mannanna.

Hérna er linkur á þessa frétt fyrir áhugasama.