Húrra!!

Líkanið mitt er orðið frekar flókið. Næstum því svo flókið að stundum skil ég ekki alveg hvað það er að meina. Eða hvert vandamálið er. Af hverju líkir það ekki eftir heiminum í einu og öllu? Við David spjöllum um sökkvandi agnir á hverjum degi þessar vikurnar. Í klukkutíma í senn. Það er geðveikt. Og framfarirnar eru eftir því. Smám saman hegðar líkanið sér meira og meira eins og heimurinn.

Vandamál eru fjölbreytt. Stundum er villa í kóðanum. Hún getur verið í mekanísmanum eða úrvinnslunni. Hún getur verið í útfærslunni eða hugsunarvilla. Við vorum sannfærð um að villan lægi í kóðanum, ekki í hugsuninni. "Í Treasure Island getur maður keypt pund af belgísku súkkulaði" útskýrir David. Guy Threepwood þeytist í gegnum huga minn og Kalli í súkkulaðiverksmiðjunni. Vó, hvað er að gerast, hvert eru þessar umræður að leiða. Nema hvað, ég er svo góður nemandi, fer eftir ábendingum leiðbeinanda í einu og öllu. Keypti belgíska súkkulaðið og ég er ekki frá því að það hafi gert gæfumuninn.