Húrra!!

Forritið sem ég er búin að vera að skrifa virkar. Allavegana nokkurnveginn. Loksins segi ég nú bara. Svaka gott mál. Agnirnar límast saman eins og þær eiga að gera og síðan vita þær líka hvaðan þær koma. Hverjir forfeður þeirra eru, hvað þeir eru gamlir, hverjir þeir voru. Voru þeir forams eða diatom, hversu mikið lífrænt kolefni er eftir. Þetta er mikilvægt því annars eru þær ráðviltar og týndar. Vita ekki hvert þær eiga að fara. Til að vita hvert maður (ögn) er að fara þarf maður (ögn) að vita hvaðan hann (hún) kom. Það er bara svo einfalt.

Tinnuborg vegnar ágætlega. Þótt byggð hafi verið korngeymsla ríkir ávallt óvissa um matarforða. Því er nú átak í að koma kornökrunum í betra stand. Ég er að hugsa um að dreifa hænsnaskít á þá, reyna að fá jafnvægi í kerfið. Síðan er næsta mál á dagskrá að þjálfa upp nokkra stæðilega drengi í að setja gildrur um þorpið ef ske kynni að nágrannarnir halda að korn sé í geymslunni. Hún er nánast tóm en setur svo góðan svip á bæinn að mér þætti afleitt ef þorparar úr næstu sveitum myndu brenna hana í bræði sínu þegar þeir kæmust að því að hún er tóm.