Húrra!!

Í morgun vaknaði ég við kirkjuklukkur. Ég reyndi að heyra ekki í þeim en þegar ég var búin að einbeita mér að því í tuttugu mínútur, þá gafst ég upp og fór á fætur. Kirkjuklukkurnar hringdu í heila 3 tíma! Eða meir því hver veit hvað þær voru búnar að hringja lengi áður en ég vaknaði. Síðan þegar ég var á leiðinni í skólann þá sá ég, mér til mikillar furðu, að kirkjuklukkuhljómarnir komu frá Reynolds Club sem er alls ekki kirkja, heldur félagsheimili nemenda. Allt hið furðulegasta.

Þetta minnti mig aðeins á því þegar við bjuggum í Dubai. Þá vaknaði maður af og til við trúarlega tóna. Í Hyde Park eru eitthvað um 17 kirkjur, þannig að það er svo sem við því að búast að vera vakinn við klukknahljóm endrum og sinnum.